“Bu cür insanların vaxtında zərəsizləşdirilməsi, ifşa olunması zəruridir” - Camal Əzimbəyli

“Belə hadisələr cəmiyyətdə təqdir olunmur, əksinə çoxluq tərəfindən nifrətlə qarşılanır. Ziyalı, inanclı insan olaraq bunu qəbul etmirəm. Biz dünyəvi ölkə olsaq da, ölkənin çoxu müsəlmanlardan ibarətdir. Milli-mənəvi, dini dəyərlərin həqiqi təəssübkeşi Azərbaycan dövlətidir. Belə olan halda, dövlət orqanları və müəssisələrində, eləcə də özəl sektorlarda bu cür halların baş verməsi milli və demokratik dəyərlərdən əlavə, İslam qaydalarına da ziddir. Dinimizin hökmlərinə görə, belə hadisələr birmənalı olaraq qətiyyətlə rədd edilir. Bu eyni zamanda milli məfkurə, şüur sahibi olan insanlarımız tərəfindən də təqdir oluna bilməz. Belə hadisənin hansısa bəraətlə əvəzlənməsi nəinki dini dəyərlərimizə, milli və mənəvi dəyərlərimizə qarşı qəsddir”.

Bunu Pravda.az-a açıqlamasında Fövqəladə Hallar Nazirliyinin əməkdaşlarının görüntüləri barəsində danışarkən şərqşünas Seyid Camal Əzimbəyli deyib.

C.Əzimbəyli bildirib ki, milli-mənəvi dəyərlərin cəmiyyətdə daha doğru və düzgün aşılanması şəraitində bu cür hadisələrin azalmasının şahidi ola bilərik: “Dövlət əhəmiyyətli, strateji müəssisələrə, idarələrə işə götürülən şəxslərin hansı kriteriyalara sahib olduğunu araşdırarkən mənəvi dəyərlərə bağlılığı da yoxlanılmalıdır. Bununla bağlı ən yüksək səviyyədə təftiş aparılmalıdır. Bu hadisə Azərbaycan ictimaiyyətinin çoxluğu tərəfindən qınanılır. Azərbaycan xanımı, anası şərəflidir. Azərbaycan qadını 44 günlük zəfər müharibəsi də daxil, 1-ci Qarabağ müharibəsindən bu günə qədər dünyaya minlərlə şəhidimizi gətirən şərəfli qadındır. Çox təəssüf ki, bəzi qadınları torlarına salan ləyaqətsiz, simasız, əxlaqsız insanlar var. Bu cür insanların vaxtında zərəsizləşdirilməsi, ifşa olunması zəruridir”.

 

Leyla Yusubova

Pravda.az

ƏVVƏLKİ XƏBƏR

Cəbhədə situasiya kəskin dəyişəcək - Ukrayna

SONRAKI XƏBƏR

Akif Nağı yeni partiyanın sədri oldu