Rusiya aviasiya sənayesinə sarsıdıcı ZƏRBƏ

Avropanın təyyarə istehsalçısı “Airbus” şirkəti bir neçə ay ərzində Rusiya titanından imtina etməyə hazırlaşır.

Musavat.com xəbər verir ki, bu barədə “Airbus”ın müdafiə və kosmos bölməsinin rəhbəri Maykl Şolhorn məlumat verib.

“Biz titan məsələsində Rusiya ilə əlaqələri kəsmək prosesindəyik. Bu, illərin deyil, ayların məsələsidir” - deyə o söyləyib.

“Airbus” hazırda ABŞ və Yaponiyadan daha çox titan almağa başlayıb, lakin onların aerokosmik standartlara uyğun sertifikatlaşdırılması üçün illər lazım ola bilər.

Bundan əvvəl ABŞ-ın təyyarə istehsalçısı “Boeing” Rusiyadan titan almaqdan imtina etmişdi. Şirkət bütün dünyada yaradılmış tədarükçülər hovuzu sayəsində kifayət qədər titan ehtiyatına malik olduğunu qeyd edib.

Rusiya dünyada ən böyük titan istehsalçısı sayılır. Titan maddəsi əsasən təyyarə mühərriklərində və böyük təyyarələr üçün eniş mexanizmlərində istifadə olunur. Müharibədən əvvəl Rusiyanın “VSMPO-Avisma” şirkəti “Boeing” üçün bütün titan ehtiyaclarının 35%-ə qədərini, “Airbus Group”un 65%-ni, “Embraer” üçün isə 100%-ni təmin edirdi.

Rusiyanın Ukraynaya müdaxiləsindən sonra ABŞ və Avropa İttifaqı Rusiyaya qarşı 8 sanksiya paketi tətbiq edib. Titan uzun müddət bu sanksiyalardan kənarda tutulub. Hətta bu ilin aprel ayında “Airbus”ın baş direktoru Giyom Fori Qərbi Rusiyadan titan idxalına embarqo qoymamağa çağırıb.

Musavat.com

ƏVVƏLKİ XƏBƏR

Avropada mövsümi qrip epidemiyası ağır olacaq

SONRAKI XƏBƏR

Siyavuş Novruzov Talıbovçu çıxdı: "Naxçıvan dövlətin arxasındadır, şəhid olmağa hazırdır..."