Türkiyə Prezidenti Rəcəb Tayyib Ərdoğan ölkənin cənub-şərqində baş verən zəlzələnin dağıdıcı təsirlərinə baxmayaraq, üç aydan sonra seçkilər keçirəcək.

Redaktor.az xəbər verir ki, bu barədə "Bloomberg" mənbələrə istinadla məlumat yayıb.

Bildirilib ki, Ərdoğanı 20 illik hakimiyyətdə olduğu ən çətin seçki yarışlarından biri gözləyir. Nəşr qeyd edib ki, dünən o, 90 günlük fövqəladə vəziyyət elan edib ki, bu da ona fəlakətdən zərər çəkmiş ərazilərlə bağlı tez qərarlar qəbul etməyə imkan verir.

Nəşrin öz mənbələrinə istinadən qeyd etdiyi kimi, fövqəladə vəziyyət başa çatdıqdan sonra Ərdoğan mayın 14-nə təyin edilmiş səsvermə keçirəcək. Mənbələr bildiriblər ki, fövqəladə vəziyyət 90 gündən əvvəl bitə bilər.

Ərdoğan bu gün təbii fəlakətdən zərər çəkmiş Kahramanmaraş və Hatay bölgələrinə səfər edib. Nəşr qeyd edir ki, zəlzələdən zərər çəkmiş rayonlarda, bir qayda olaraq, onun partiyasına səs verən və onun seçki uğurunda mühüm rol oynayan əhali var. İndi hökumətin insanları xilas etmək və dağıntılar altında olan 13,4 milyon insana yardım çatdıra bilməsi Ərdoğan üçün seçkilər öncəsi əsas məsələdir.

Bloomberg Economics-in məlumatına görə, kataklizmdən sonra hökumətin xərcləri iki il ərzində ÜDM-in 5,5%-nə çata bilər.

Bundan əlavə, “Anadolu”nun məlumatına görə, Ərdoğan Kahramanmaraşda çıxış edərkən zərər çəkmiş hər ailəyə dövlətdən 10 min lirə yardım alacağını bildirib. O, həmçinin bildirib ki, təbii fəlakət zonasının sakinləri istəsələr, Antalya, Alanya və Mersində otellərdə yerləşdirilə bilərlər.

Prezident bildirib ki, hökumət bir il ərzində zəlzələdən zərər çəkmiş 10 vilayətin sakinlərini yeni mənzillərlə təmin etməyi qarşısına məqsəd qoyub.

Xatırladaq ki, fevralın 6-na keçən gecə Türkiyə və Suriyanın sərhədyanı bölgələrində 7,8 bal gücündə güclü zəlzələ baş verib. Bunun ardınca onlarla güclü zəlzələ, günorta isə 7,7 bal gücündə daha bir güclü zəlzələ baş verib. O vaxtdan bəri qurbanların sayı durmadan artmağa davam edir.

Turan İSMAYIL

Mənbə: redaktor.az