“Mübariz Mənsimovun həbsi heç şübhəsiz ki, siyasi qərardır və ittiham da quramadır. Məndə heç bir şübhə də yoxdur ki, getdikcə əkizləşən rejimlərin qarşılıqlı istəkləri üzərinə qərar verilib. Belə rejimlər, adətən, tənqidçi insanları əsas qarşı olduğunu nümayiş etdirdiyi mövzular üzərindən şərləyirlər. Bu artıq təcrübəyə çevrilib. Mübariz bəy də həbsinə etiraz olaraq aclıq edir, eyni zamanda müvafiq müraciətlər. Onun hansısa ümidlərlə etdiyi müraciətə heç bir halda şərh vermək istəmirəm. Həbsdə olan insanın durumunu yalnız orada olmaqla tam anlamaq olar. Bütün halda həbsini pisləyir, haqsızlığa qarşı mübarizəsini tam müdafiə edirəm”.

Pravda.az-ın xəbərinə görə, bunu Mərkəzi Seçki Komissiyasının sabiq üzvü, Demokratik Təşəbbüslər İnstitutunun rəhbəri Akif Qurbanov deyib.

A.Qurbanov M.Mənsimovun müdafiəsilə məşğul olan və buna səlahiyyətli olan şəxsləri beynəlxalq hüquqi müdafiə mexanizmlərindən və advokasi fəaliyyətindən mütləq şəkildə istifadə etməyə səsləyib: “Özümüzü aldatmayaq, Ərdoğandan və ya Əliyevdən gözləntilər bir yerə qədər olur. Sonra real vəziyyəti anlayanda bəzən gec olur ki, niyə hüquqi müdafiəsi vaxtında düzgün qurulmayıb. Anlayıram ki, indi dünyanın gündəmi başqadır, Ərdoğan da beynəlxalq mexanizmləri çox da sayan deyil. Amma bütün hallarda ən doğrusu, konkret prinsip və yolları olan, həm də nəticə verə bilən mexanizmləri işə salmaq ən real yoldur. Çünki xahişlərin konkret bədəli olur, o da işləsə. İkincisi də, zatən tutduranlar tutulanı da, vəziyyəti də bilir, hər şey onların istəyi üzərinə baş verib və qərar verərkən də nəticəni belə qısa müddətdə dəyişmək üçün verməyiblər. Ona görə də (bilmirəm Mübariz bəy ideoloji olaraq bu yolu inkar edir, ya yox) bütün hallarda belə vəziyyətlərdə ən optimal yol oturuşmuş beynəlxalq təcrübədən yararlanmaqdır. Mübariz bəyin statusu və imkanları bu yoldan yararlanmağı həm də daha əlverişli edir”.

Mənbə: pravda.az