Sabiqlərin Fonda ianə məbləği ikrah doğurur

Axar.az Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyevin Moderator.az-a müsahibəsini təqdim edir:

- Qüdrət bəy, Koronavirusla Mübarizəyə Dəstək Fonduna məmurların, iş adamlarının, qeyri-rəsmi milyonçuların və milyarderlərin köçürdüyü pulun məbləğindən xəbəriniz var. Sizcə, məmurlar nə dərəcədə səmimi yanaşdılar Prezidentin bu təşəbbüsünə? Bir neçə gün öncə xəbər yayıldı ki, özbək milyarder ölkəsinə 20 milyon dollar ayırdı koronavirusla mübarizə üçün. Bəs bizim milyarderlər niyə səxavət kisəsinin ağzını bərk-bərk bağlayıblar?

- Dediklərinizdə müəyyən qədər haqlısınız. Ona görə də mən hər zaman çağırış edirəm ki, cəmiyyətdə xeyriyyəçilik təbliğ olunsun, bu istiqamətdə bizim din xadimləri də daha çox iş görməlidirlər. Bizim iş adamları qeyd etdiyiniz özbək milyarder kimi, virusla mübarizəyə 20 milyon dollar ayırmasa da, “Paşa Holdinq” 5 milyon dollar ayırdı, qaçqınlar üçün böyük bir yaşayış kompleksi tikdi, bir milyon manat ətrafında pul köçürən çoxlu şirkətlərimiz oldu, “Gilan Holdinq” bir milyon manat pul köçürməklə yanaşı, otellərini əvəzsiz olaraq karantində olanlar üçün ayırdı və s. Şəxsi hesablardan pul ödəməyə gəldikdə Prezident və Birinci vitse-prezidentin bir illik əmək haqlarını, bizim keçmiş deputat həmkarlarımızdan Elxan Süleymanovun bir illik təqaüdünü, Cavid Qurbanovun şəxsi hesabından 10 min manat vəsaiti Fonda köçürmələri cəmiyyətdə məmnunluq yaradan nümunələrdir. Bu siyahını uzatmaq da olar. Amma sizinlə razıyam ki, imkanlı şəxslər indiki zamanda daha səxavətli olmalıdırlar. Xeyriyyəçilikdən savab, insanı daxilən rahatladan başqa bir iş ola bilməz. Bəzi qeyri-rəsmi milyarder sabiqlərin Fonda köçürdüyü pulun məbləğı həqiqətən cəmiyyətdə ikrah doğurur.

- Qüdrət bəy, Nazirlər Kabinetinin Prezidentin 19 mart 2020-ci il tarixli sərəncamının icrası ilə bağlı iqtisadiyyatın inkişafına dair qəbul etdiyi Tədbirlər Planına münasibətiniz necədir?

- Dövlət İnvestisiya Holdinqinin və Azərbaycan İnşaat Korporasiyasının yaradılmasını müsbət qarşılayıram. Əgər onlar qarşıya qoyulan vəzifələri qısa müddətdə icra edəcəklərsə, bu iqtisadi inkişafa böyük təkan verəcəkdir. Yox, çoxlu qərarlar qəbul edilib, hər dəfə çoxlu yeni strukturlar yaradılacaqsa və az iş görüləcəksə, proses aylarla, illərlə uzadılacaqsa, bu da 2016-cı ildə qəbul olunmuş "Yol Xəritəsi" kimi ciddi nəticə verməyəcək. Dəfələrlə vurğulamışam ki, xidmət sahələri, iri dövlət şirkətləri daxil, böyük özəlləşməyə getmədən, tenderlərin keçirilməsində şəffaflığı, sahibkarların aşağı faizli kreditlərə çıxışını təmin etmədən, tikinti şərtlərini sadələşdirmədən, "kölgə iqtisadiyyatı"nı aradan qaldırmaq üçün nağdsız ödənişlərə keçilmədən, normal fəaliyyət göstərən səhm bazarı yaratmadan və bunu təbliğ etmədən, proteksionizmə son qoyulmadan, mülkiyyətin toxunulmazlığına təminat verən güclü məhkəmə hakimiyyəti yaratmadan neft sənayesindən asılı olmayan güclü iqtisadiyyat qurmaq çətin olacaq. O cümlədən, sahibkarların gömrük rüsumlarından və vergidən yayınmasının qarşısını almaq üçün bu istiqamətdə aparılan islahatlar davam etdirilməlidir. İdxal olunan əmlakın dəyəri ilə pərakəndə satışı arasındakı fərq izlənilməli və iqtisadi inkişafı stimullaşdıracaq ədalətli vergi tətbiq olunmalıdır.

Axar.az

ƏVVƏLKİ XƏBƏR

Dünyada və Azərbaycandakı karantin rejimi

SONRAKI XƏBƏR

Azərbaycanda pomidor və xiyarın qiyməti kəskin ucuzlaşdı - Video