"Azərbaycan Respublikası koronavirus testlərinin aparılmasına görə dünyada 30-cu yerdə qərarlaşıb. Bu da dünyada ən yaxşı nəticələrdən biridir" Azvision.az xəbər verir ki, bunu Azərbaycan Respublikası Prezidentinin köməkçisi, Prezident Administrasiyasının xarici siyasət məsələləri şöbəsinin müdiri Hikmət Hacıyev deyib.

O bildirib ki, bu gün ölkədə 50 mindən çox test aparılıb: "Qarşıdakı dövrdə də testlərin sayının əhəmiyyətli dərəcədə artırılması nəzərdə tutulur. Bu da dövlətimizin növbəti uğurudur. Növbəti vacib bir məqamı qeyd etmək istərdim. Bəzən KİV-lərdə bu sual olunur ki, hər hansı bir ölkədə virusa yoluxanların sayı azdır. Yoluxanların sayının azlığı o deməkdir ki, həmin ölkədə bu xəstəlik yoxdur. Bu, o deməkdir ki, ölkənin test imkanları yetərli səviyyədə deyil. Azərbaycanda hədəfli auditoriya üzrə aparılan testlərin nəticəsidir ki, bu hallar müəyyən olunub"

H.Hacıyev vurğulayıb ki, ölkədə ərzaq tədarükü ilə bağlı bütün zəruri tədbirlər görülüb: "Azərbaycanda koronavirusla mübarizə tədbirləri kompleks və qabaqlayıcı xarakter daşıyır. Hətta yanvar ayının əvvəllərində dövlət başçısının rəhbərliyi və tapşırığı altında bütün sahələrdə olduğu kimi, ərzaq tədarükü və təchizatının müəyyən dövr ərzində təminatı ilə bağlı zəruri tapşırıqlar verilib. Yəni zəruri ehtiyatlar təmin olunub. Biz digər ölkələrlə müqayisə etsək, Azərbaycanda supermarketlərin boşalması hallarını müşahidə etmədik. Bu da zəruri tədarüklərin görülməsinin nəticəsidir".

Kənan Məmmədov

Mənbə: azvision.az