Tokayev Almatıda ölən polislərə orden verdi

İldırım Musayev, Mərkəzi Asiya ölkələri üzrə xüsusi müxbir

Qazaxıstan Prezidenti Qasım-Jomart Tokayev Almatıdakı bir keçid məntəqəsində sərxoş sürücünün avtomobili ilə toqquşma nəticəsində vəfat edən polis işçilərinə dövlət mükafatlarının verilməsi haqqında sərəncam imzalayıb.

KONKRET.az-ın Mərkəzi Asiya ölkələri üzrə bürosu xəbər verir ki, bu barədə mayın 26-da prezidentin mətbuat xidməti məlumat yayıb.

Xidmət vəzifəsini nümunəvi şəkildə yerinə yetirdiyinə, asayişin qorunmasında fəal iştirak etdiyinə görə II dərəcəli “Aybın” ordeni baş leytenant Janqaziyev Jaras Sultanqalieviçə (ölümündən sonra) – Daxili İşlər Nazirliyinin Almatı Şəhər Polis İdarəsinin patrul polis alayının inspektoruna və III dərəcəli “Aybın” ordeni Abdıkanov Dastan Maratjanulıya (ölümündən sonra) – Daxili İşlər Nazirliyinin Almatı Şəhər Polis İdarəsinin patrul polis alayının əməkdaşına verilir.

Mayın 25-də səhər saatlarında bir BMW markalı avtomobilin sərxoş sürücüsü yüksək sürətlə nəzarət-buraxılış məntəqəsindəki beton qoruyucuya çırpılıb və daha sonra zərbə ilə içərisində iki polis əməkdaşı olan patrul maşınına dəyib.

Polisin biri hadisə yerində, digəri isə xəstəxanada ölüb.