Dağıstandakı səyyar sahə düşərgəsində sərhədlərin bağlı olması səbəbi ilə vətənə dönə bilməyən Azərbaycan vətəndaşları üçün 150 yerlik əlavə çadırlar quraşdırılıb.

“Report” xəbər verir ki, bu barədə TASS-a Dərbənd rayonunun başçısı vəzifəsini icra edən Fuad Şıxıyev məlumat verib.

Məmur deyib ki, orada məskunlaşması planlaşdırılan vətəndaşlardan koronavirusla bağlı testlər götürülüb.

“Məskunlaşmaya xüsusi analizdən sonra - iyunun 1-dən başlanılacaq”, - “RİA Novosti” Rusiya FHN əməkdaşından sitat gətirib.

Daha əvvəl Rusiyadan vətənə qayıdan daha 175 Azərbaycan vətəndaşı barədə məlumat verilmişdi.

Mənbə: report.az