Sevinc Vaqifqızı prezident seçkisindən bir il sonra məhkəməyə verildi

Jurnalist Sevinc Vaqifqızı məhkəməyə verilib.

Bu barədə jurnalist feysbukda məlumat yayıb.

Jurnalist bildirib ki, onu ötən il prezident seçkisində çəkdiyi videosujetə görə məhkəməyə veriblər: "Prezident seçkilərindən bir il sonra 251 nömrəli məktəbin direktor müavini Elmira Alandarova məni məhkəməyə verib. İddia edir ki, hazırladığım süjetdə onun şərəf və ləyaqətini alçaltmışam. Tələb edir ki, həmin süjet Meydan TV və Azadlıq qəzetinin səhifələrindən silinsin, üzrxahlıq edilsin və dəymiş mənəvi zərərə görə ona 2500 manat kompensasiya ödəyim".

S. Vaqifqızı qeyd edib ki, proses 27 may saat 9:30-da Binəqədi Rayon Məhkəməsində başlayacaq.

2018-ci il aprelin 11-də keçirilmiş prezident seçkilərində jurnalist Sevinc Vaqifqızı 251 nömrəli məktəbdə yerləşən seçki məntəqəsində müşahidə aparıb.

O qeyd edib ki, direktor müavini gah 25 saylı Nizami 2-ci Seçki Dairəsinin 14 saylı, gah da həmin dairənin 16 saylı məntəqəsində peyda olub.

Onun karuselə nəzarət etdiyi də vurğulanıb.

Mənbə: www.regionxeberleri.com