Yay aylarında havaların kəskin istiləşməsi ilə kondisionerlərdən istifadə xeyli artır. Mütəxəssislər bildirirlər ki, kondisionerin özü xəstəlik yaratmır, lakin ondan düzgün istifadə edilmədikdə və cihazın texniki baxımı vaxtında aparılmadıqda sağlamlıq problemlərinə səbəb ola bilər.
Uzun müddət aşağı temperaturda işləyən kondisioner orqanizmdə temperatur fərqinin kəskin dəyişməsinə səbəb olur. Bu isə bəzi insanlarda baş ağrısı, əzələ ağrıları, boğaz qıcıqlanması və burun tutulması kimi narahatlıqlar yarada bilər.
Digər mühüm problem isə havanın qurumasıdır. Kondisioner işlədikdə otaqdakı rütubət azalır, nəticədə dəri quruluğu, gözlərdə yanma hissi və boğazda quruluq müşahidə oluna bilər. Xüsusilə kontakt linza istifadəçiləri və allergiyası olan şəxslər bu təsirləri daha çox hiss edirlər.
Mütəxəssislərin sözlərinə görə, filtrləri uzun müddət təmizlənməyən kondisionerlərdə toz, kif və müxtəlif mikroorqanizmlər toplana bilər. Bu isə allergiya, astma və digər tənəffüs yolu xəstəliklərinin şiddətlənməsi riskini artıra bilər.
Həkimlər kondisionerin temperaturunun 24–26 dərəcə arasında saxlanılmasını, otağın vaxtaşırı havalandırılmasını və filtrlərin mütəmadi olaraq təmizlənməsini tövsiyə edirlər. Eyni zamanda, kondisionerin hava axınının birbaşa insanın üzərinə yönəldilməməsi məsləhət görülür.
Mütəxəssislər vurğulayırlar ki, düzgün istifadə və müntəzəm texniki xidmət göstərilən kondisioner sağlamlıq üçün ciddi təhlükə yaratmır, əksinə, isti havalarda komfortu artıraraq istilik vurmasının qarşısını almağa kömək edir.
Aysel
Mənbə: azxeber.com
scorpion.az