Ermənistanda separatçılarla hakimiyyət arasında mübarizə kəskinləşib.
İki həftə öncə Ermənistanın İstintaq Komitəsinin müstəntiqləri separatçıların İrəvana qaçan sonuncu “başçısı” Samvel Şahramanyanın xidməti avtomobilini müsadirə etmək üçün onun əyləşdiyi “nümayəndəliyin” binasına gedib. Lakin Şahramanyan binada olmayıb. Məlumata görə, Ermənistan hökuməti separatçıların İrəvanda hələ də fəaliyyət göstərən qondarma “nümayəndəliyinin” binasını da onların əllərindən almaq istəyir.

Şahramanyan da öz növbəsində Paşinyana qarşı açıq mübarizəyə başlayıb. O, iyunun 13-də Xankəndinin keçmiş qondarma “meri” Davit Sarkisyanın məhkəməsinə gedib, çıxarkən jurnalistlərə açıqlamasında hakimiyyəti tənqid edib, Qarabağda baş verənlərə görə Paşinyanı günahlandırıb.

Onun bu açıqlamalarından 8 gün sonra İstintaq Komitəsinin müstəntiqləri xüsusi təyinatlı qüvvələrlə birlikdə yenidən qondarma “nümayəndəliyin” binasına gedib. Binanın qapıları bağlı olduğu üçün içəri girə bilməyiblər, lakin cəmi 7 dəqiqə gözləmədən sonra qapıları qıraraq, içəridəki avtomobili müsadirə ediblər.

Ermənistan hakimiyyətinə qarşı etirazlara liderlik edən “Vətən üçün Tavuş” hərəkatının rəhbəri, keşiş Baqrat Qalstyan isə buna cavab olaraq, öz avtomobilini Şahramanyana verib.

Bütün bu məlumatların mediadan maksimum gizlədildiyi deyilir. Mediaya sızan məlumatlar isə göstərir ki, İrəvanda separatçılarla hakimiyyət arasındakı mübarizə artıq fiziki mərhələyə keçib.

Asif

Mənbə: publika.az