Yapon alimləri müəyyən ediblər ki, Qərb yarımkürəsində yayılmış SARS-CoV-2 XBB.1.5 koronavirusunun "Omicron" variantı yüksək ötürücü və yoluxucudur.
Lent.az xarici KİV-ə istinadən xəbər verir ki, SARS-CoV-2 XBB.1.5 ilk dəfə 2022-ci ilin oktyabrında aşkar edilib.
Alimlər deyiblər ki, bu variantda S zülalında yeni mutasiya var, bu da virusun angiotenzin-çevirici ferment 2 (ACE2) adlı hüceyrə reseptoruna bağlanmasına və onun insan hüceyrələrinə nüfuz etməsinə imkan verir. Mutasiya 486-cı mövqedə amin turşusu serininin prolinlə əvəzlənməsini təşviq edir və bir sıra səbəblərə görə virusoloji təhlükə yaradır.
S zülalının XBB.1.5 reseptor bağlayan sahəsi (RBD) ilə insan ACE2 reseptoru arasında fiziki qarşılıqlı əlaqəyə uyğun olan dissosiasiya sabiti (KD) XBB.1 S RBD ilə müqayisədə əhəmiyyətli dərəcədə (4,3 dəfə) aşağıdır. KD obyektin dissosiasiyaya, yəni hissəciklərə ayrılmağa meylini xarakterizə edir. Başqa sözlə, XBB.1.5 variantı insan ACE2 reseptoruna çox yüksək yaxınlıq ilə bağlanır.
XBB.1.5 S zülalı BA.2/BA.5 subvariantlarının sıçrayışlı infeksiyaları nəticəsində yaranan neytrallaşdırıcı anticisimlərə yüksək davamlıdır. Beləliklə, əvvəllər BA.2/BA.5 infeksiyası olan xəstələr XBB.1.5-ə qarşı güclü immunitet nümayiş etdirməyə bilər, bu da onların infeksiya və xəstəlik şanslarını artırır.
"The Genotype to Phenotype Japan (G2P-Japan) Konsorsium"unun üzvləri belə qənaətə gəliblər ki, SARS-CoV-2 XBB.1.5 Şərq yarımkürəsi də daxil olmaqla, ictimai sağlamlıq üçün ciddi təhlükəyə çevrilə bilər və profilaktik tədbirlər görülməlidir.
