Liviyanın hüquq-mühafizə orqanları külli miqdarda ekstazi həbləri müsadirə ediblər.
"Independent" nəşrinin məlumatına görə, narkotik vasitələr ölkənin devrilmiş lideri Müəmmər Qəddafinin başı formasında hazırlanıb.
Tripoli təhlükəsizlik xidmətindən bildirilib ki, narkotiklər Avropadan qeyri-qanuni olaraq gətirilib. Nəşrin məlumatına görə, sabiq liderin üz cizgiləri və geyim elementləri ətraflı şəkildə işlənmiş qəhvəyi rəngli həblər aşkar olunub.
Xüsusi xidmət orqanları Avropadan gələn dəniz yükünü izləyib və furqonda təxminən 100 000 ədəd ekstazi həbi aşkar ediblər. Şübhəlilər saxlanılaraq məhkəməyə təhvil veriliblər.
"Independent" qeyd edir ki, BMT yanvar ayında Liviyanın həm ölkə daxilində, həm də bütün Afrika qitəsində yayılan sintetik narkotiklərin qaçaqmalçılığı üçün əsas tranzit məntəqəsinə çevrildiyi barədə hesabat dərc etmişdi.
Mənbə: bizim.media
scorpion.az